Një analizë ADN-je ka sjellë zbardhjen e grabitjes dhe tentativës së vrasjes në Allias të ndodhur mesnatën e 19 janarit 2020 në dëm të shtetasve Petrit dhe Afërdita Laze.
Kjo analizë shkencore është arritur të kryhet falë, marrjes së një kampioni pështyme në një nga maskat e gjetura jo shumë larg vendit të ngjarjes, ku rezultati i kësaj analize ka çuar në identifikimin e njërit prej autorëve pjesëmarrës në këtë grabitje Fatjon Mertënikaj.
28-vjeçari është arrestuar ditën e djeshme nga policia, e cila në bashkëpunim edhe me prokurorinë e Tiranës,kanë arritur të zbardhin këtë ngjarje të rëndë, ku veç Mernikaj është identifikuar dhe shpallur në kërkim e Markelian Cungu, ky i fundit një hajdut serial në Tiranë dhe jo vetëm dhe Mario Toci për moskallëzim krimi.
“Plani për grabitjen e çiftit Laze në Allias të Tiranës, është thurur nga Markelian Cungu”-kështu ka deklaruar në polici pas arrestimit Fatjon Mertnikaj. Ky i fundit ka shtuar se plani është ideuar nga Markeliani, madje ai kishte siguruar armët, një automatik dhe një pistoletë, ku automatikun ja kishte dhënë Fatjonit ndërsa pistoletën Markeliani e ka mbajtur vetë. Gjatë rrëfimit në polici, 28-vjeçari ka treguar se Markelian Cungu, i kishte thënë që të shkonin të vidhnin një banesë, pasi aty nuk kishte njeri.
“Më dha automatikun ndërsa pistoletën e mbajti vetë, kemi hyrë në banesë natën vonë, pasi Markeliani më tha se në shtëpi nuk banonte njeri. Por jemi ndeshur me përballjen e të zotit të shtëpisë, ndaj dhe kemi reaguar me armë…”-ka treguar Fatjon Mertnikaj.
Ky i fundit ka shtuar se ditën e ngjarjes ishin veshur me përparëse grash ngjyrë të zeza dhe me maska. Pikërisht në njërën prej këtyre maskave të sekuestruara jo shumë larg vendit të ngjarjes, policia ka arritur të nxjerrë kampione pështyme, ku pas analizave në laboratorin e policisë shkencore është arritur të identifikohet se njeriu që kishte marrë pjesë në këtë grabitje me pasoja të rënda, ishte Fatjon Mërtnikaj.
Ky i fundit para arrestimit është thirrur në polici dy herë, ku I është marrë kampion pështyme dhe urine, ku sigurisht është marrë në pyetje. Por shoqërimi disa herë në polici, solli dhe shqetësimin e 28-vjeçarit i cili ka kuptuar se po i ngushtohej liria dhe mund të arrestohej.
Për t’iu shmangur një arrestimi të mundshëm, Mertnikaj mbrëmjen e djeshme është nisur me taksi nga Tirana në drejtim të Rinasit ku kishte planifikuar largimin e tij nga Shqipëria në drejtim të Italisë me qëllim shmangien e procedurave të hetimit.
Pritet që në ditët në vijim 28-vjeçari i arrestuar të dalë para gjykatës së Tiranës për tu njohur me masën e sigurisë “arrest në burg”, ndërsa për Markelian Cungun është marrë masa “arrestit në burg” në mungesë.
