Asambleja Kombëtare votoi kryesinë e re të Partisë Socialiste me të cilën kryesocialisti Edi Rama do të udhëheqë partinë më të madhe në vend drejt zgjedhjeve të 2017-s.
Në listën e zonjave socialiste më të votuarat ishin ministret Gjermeni dhe Kodheli së bashku me deputeten Vasilika Hysi. Tre kandidatet Anila Shehu, Klotilda Ferhati dhe Ogerta Manastriliu në garë për antare të kryesisë, që të treja prurje të reja në PS, ishin më pak të votuarat. Asambleja nuk e votoi mjaftueshëm edhe Ermonela Felajn, ministre e Marrëdhënieve me Parlamentin për të qenë pjesë e kryesisë. Ndërsa gara e zotërinjve socialistë ku në fletën e votimit ishin zv.kryeministri Peleshi, 5 ministra, 4 kryebashkiakë dhe 7 deputetë, prodhoi një garë të fortë për 13 vendet e tyre në kryesi. Dy më të votuarit me numër të barabartë votash, 241, ishin Pandeli Majko dhe Blendi Klosi, pasuar nga Erion Veliaj 236 vota ndërsa Saimir Tahiri mori 234 vota. Më pak të votuarit që mbetën jashtë kryesisë janë deputetët Bensnik Bare, Eduard Shalsi dhe Ulsi Manja së bashku me kryebashkiakun e Elbasanit, Qazim Sejdini. Postin e Sekretarit të Përgjithshëm, të rikthyer me ndryshimet statutore, do ta mbajë Gramoz Ruçi pas një votimi që ishte thjesht formalitet, pasi nuk pati rivalë. Asambledhja zgjodhi gjithshtu edhe sekretariatin ekzekutiv me 6 sekretarë.
