Një ngjarje e rëndë ka ndodhur mbrëmjen e djeshme në detin Jon, 100 milje në jug-lindje të bregut të Kalabrisë, ku një varkë me vela e nisur nga Turqia me rreth 80 emigrantë afganë, iranianë dhe kurdë është mbytur. Sipas “La Republicca”, 65 persona të cilët ndodheshin në bordin e kësaj varke janë zhdukur, ndërsa 1 grua ka ndërruar jetë sapo ka mbërritur në Roccella Ionica. Po ashtu, deri më tani raportohet për 11 të mbijetuar, të cilët janë gjetur nga autoritetet në gjendje të rëndë shëndetësore.
Çfarë e bën edhe më të rëndë rastin është se varkë raportohen të kenë qenë të paktën 26 fëmijë, disa prej tyre foshnja, të cilët janë në mesin e të zhdukurve.
Njëmbëdhjetë emigrantët – mes tyre 2 gra, njëra shtatzënë, u shpëtuan nga Roja Bregdetare italiane dhe u dërguan fillimisht në portin kalabrez të Roccella Jonica dhe më pas u akomoduan në një strukturë të Kryqit të Kuq. Deri më tani dyshohet se shkak i mbytjes së varkës ka qenë një defekt në motorin e saj që ka degjeneruar në zjarr.
