Basha:Jo pazar me PS-LSI. Fushatë me foton e Trump
‘Kanë mbetur në derë të Republikës së re duke kërkuar dorën, por nuk do të ketë pazar as me PS dhe as me LSI”. Kështu u shpreh Lulzim Basha gjatë takimeve në qytetin e Kuçovës, duke u kërkuar qytetarëve që mos dëgjojnë sirenat për koalicione në qeverisje me PS pas 25 qershorit. “Mos dëgjoni sirenat se flasin për pazare dhe koalicione. Republika e vjetër është bërë reçkë dhe nuk kanë pikë turpi, kanë mbetur në derë të Republikës së re duke kërkuar dorën. Si thoni t’ua dorën? Jo, do u japim brrylin. Kjo lëvizje nuk është e imja por e qytetarëve. Jo pazar me Ramën dhe Metën, por Republikën e re të qytetarëve shqiptarë. Nuk do të bëjmë pazar as me PS as me LSI do të mendojmë vetëm për interesat tuaja”, tha Basha. Ndërkohë që vijoi me akuzat ndaj PS dhe LSI për drejtimin e vendit në 4 vite. Më pas kreu i PD iu rikthye edhe njëherë takimit me Presidentin e SHBA, pak ditë më parë. Basha fushatë me foton e Donald Trump Gjatë takimeve në Kuçovë, kryetari i PD, Lulzim Basha ndërsa mbante në duar foton me Presidentin e SHBA u shpreh se ai ishte frymëzimi i lëvizjes. Basha tha se slogani i demokratëve është “Ekonomi e fortë, e nesërme e sigurt”. Ndërkohë që fotografitë e Bashës me Trump janë shpërndarë edhe në radhët e simpatizantëve të PD gjatë takimeve. “Edhe ky burrë (tregon foton me Trump) e nisi rrugën e tij kundër establishmentit politik. Takimi me Trump ishte një nder dhe privilegj, ai është burim frymëzimi i lëvizjes që nisëm” tha ai.
