Kryeministri Edi Rama i ka kthyer përgjigje opozitës me në krye Lulzim Bashën të cilët në deklaratat e tyre të fundit kanë përsëritur njëzëri rritjen e numrit të testimeve. Shefi i kabinetit qeveritar shprehet se një gjë e tillë është përcaktuar nga ekspertëve e Komitetit Teknik, dhe se politika duhet të bëjë një hap pas në këtë drejtim.
Nuk ka nguruar të bëjë edhe ironi me Bashën, sa i përket ngatërrimit që ky i fundit ka pasur më herët me tabelën e shumëzimit.
“PD s’mund të japë mend as për tabelën e shumëzimit, jo më për strategjinë e testimit! Strategjia e testimit është detyrë e Komitetit Teknik që udhëheq luftën në vijën e zjarrit. Detyra e politikës, qeverisë a opozitës është të dëgjojë dhe mbështesë ekspertët. Të tjerat janë 7×7=42”, shkruan Rama.
Ky reagim vjen pas deklaratës së kryedemokratit Lulzim Basha, i cili ditën e djeshme tha se numri i ulët i testimeve fsheh të vërtetën dhe kushton jetë, prandaj qeveria duhet të veprojë tani ose sipas tij do të jetë shumë vonë.
