Një mikrobuz me 6 minorenë shqiptarë të pashoqëruar ka mbërritur dje rreth drekës nga qyteti i Piacencës në selinë e Konsullatës shqiptare në Milano. Minorenët i shoqëronte këshilltari për çështjet sociale e familjen në bashkinë e Piacencës z. Stefano Cugini.
“Nuk kemi më vende për t’i mbajtur e po i dorëzoj pranë Konsullatës shqiptare për t’i kthyer në vendin e tyre të origjinës”, ka deklaruar funksionari i bashkisë së Piacencës. Së bashku me pasaportat e tyre 6 minorenët shqiptarë kanë populluar korridoret e Konsullatës shqiptare në Milano në pritje të fatit të tyre. Kanë qenë momente tensioni, mes autoriteteve të konsullatës shqiptare e këshilltarit të bashkisë së Piacencës, ankesa e të qara nga ana e minorenëve shqiptarë, fakt që ka kërkuar dhe ndërhyrjen e policisë së qytetit të Milanos por dhe të DIGOS, repartit të forcave speciale të qytetit për të qetësuar një situatë delikate që ka të bëjë me minorenët e pashoqëruar. Një javë më parë, Stefano Cugini i ka kërkuar në konsullatën shqiptare në Milano rikthimin në Shqipëri të një minoreni 17 vjeçar shqiptar me emrin Ciko, të cilin babai i tij e kishte shoqëruar nga Shqipëria në Itali. Pas kësaj ngjarje e brenda vetëm një jave, 5 minorenë të tjerë të pashoqëruar shqiptarë kanë mbërritur në qytetin e Piacencës. Fluksi nuk është ndaluar e sipas këshilltarit të bashkisë së Piacencës “ky fakt e ka detyruar të nis të gjithë minorenët shqiptarë të pashoqëruar që kanë mbërritur gjatë ditëve të fundit në këtë qytet drejt konsullatës shqiptare në Milano, me kërkesën e riatdhesimit të tyre.” Në profilet zyrtare të tij në rrjetet sociale Stefano Cugini, proteston duke shkruar se “bëhet fjalë për të mbrojtur me dhëmbë të drejtën e mikpritjes me dinjitet, efikasitet e aftësi çdokënd që ka vërtetë nevojë. Është në lojë përdorimi korrekt i parave publike, para që duhen impenjuar sa më mirë . Është një betejë etike për këdo që ul kokën para padrejtësive e në këtë rast para një ligji që na bën të jemi fajtor.” Po në rrjetet social funksionari i bashkisë së Piacencës publikon fotografinë me konsullen shqiptare në Milano e cila mban në duar pasaportat e 6 minorenëve shqiptarë. “Zonja në fotografi, shkruan këshilltari bashkiak është Konsullja e Shqipërisë në Milano. Mban në duart pashaportat e 6 minorenëve shqiptarë. Ky është demonstrimi dokumentar që i dorëzova në tokën shqiptare e në duart e funksionarit më të lartë diplomatik, shtetasit minorenë shqiptarë, që i përkasin një shteti sovran e që janë braktisur në Itali nga prindërit e tyre. “ “Rezultati?-thotë ai -“Zero përgjegjësi, e tentativa të vazhdueshme të konsulles për të më kthyer pasaportat mbrapsht si dhe kërkesa e saj e mëshirshme për t’u ndihmuar nga ndërhyrja e Policisë italiane. Instrument i përdorur për t’u çliruar nga mbajtja e pasaportave si dhe nga minorenët. Nëse kjo nuk është e turpshme…” Me ndërhyrjen e forcave italiane të rendit, 6 minorenët shqiptarë u rikthyen në qytetin e Piacencës shoqëruar nga këshilltari bashkiak Stefano Cugini.
