Deputeti që pritet të emërohet kandidat I Partisë Socialiste për Bashkinë Shkodër në zgjedhjet e 14 majit, Benet Beci ka reaguar pas protestës së zhvilluar nga banorët e Dukagjinit për ndërtimin e rrugës në këtë zonë. Përmes një postimi në rrjetin social “Facebook”, Beci shkruan se:
“Sot në Shkodër po mbahet protesta e dytë për rrugën e Dukagjinit nga komuniteti i zonës.
Siç e kam deklaruar publikisht edhe në protestën e parë, jam plotësisht dakord me protestën dhe e mbështes kërkesën e tyre të drejtë për ndërtimin e rrugës.
Do ta firmos patjetër edhe peticionin drejtuar autoriteve për ndërtimin e rrugës. Angazhohem që projektin e hartuar të rrugës ta bëjmë publik në një takim të hapur me të gjithë të interesuarit në momentin më të parë së bashku me inxhinierët dhe agjensitë qeveritare që kanë përgatitur projektin. Hapi tjetër duhet të jetë akordimi i fondeve për fillimin e këtij investimi madhor.
Njëkohësisht u bëj thirrje autoriteteve vendore të bashkisë Shkodër si insitucioni përgjegjës për rrugën, të mos fshihen pas shkresave të vagullta e të keqadresuara, por të marrin menjëherë masa për mirëmbajtjen e rrugës para sezonit pranveror, në të kundërt t’i kërkojnë qeverisë heqjen e rrugës nga inventari i saj dhe kalimin në inventarin e ARRSH-së si rruga Han i Hotit-Tamarë-Vermosh apo rruga Koplik-Bogë-Theth të cilat janë qartësisht të mirëmbajtura gjatë gjithë vitit.” – përfundon reagimi I deputetit Beci.
