Ky është Adam Maca, nënkampioni i botës në boks për 16 vjeçarët i cili u prit në aeroportin e Rinasit për të festuar këtë sukses të arritur në Armeni pak ditë më parë. Maca siguroi me kombëtaren shqiptare një prej rezultateve më të larta në historinë e boksit shqiptar nën drejtimin e trajnerit shkodran Klaudio Çekini. 16 vjeçari ndjehet i lumtur që mes Anglisë dhe Shqipërisë zgjodhi kombëtaren kuqezi.
“Jam shumë i lumtur që zgjodha Shqipërinë dhe që arrita të shpallem nënkampion bote. Ishin ndeshje të vështira por me shumë punë ia arritëm. Besoj se kam bërë zgjedhjen e duhur dhe jam i kënaqur që arrita të shkruaj historinë me flamurin kuqezi. Shpresoj që në të ardhmen do të sjell të tjera medalje dhe do jemi pjesë e historisë”.
Trajneri i 16 vjeçarëve të Shqipërisë Klaudio Çekini thotë se ky sukses i Adam Macës por edhe kombëtares që drejton është një arritje e madhe.
Presidenti i Federatës Shqiptare të Boksit Florend Kalivopulli e cilëson fitimin e titullit nënkampion bote nga Adam Maca si rezultatin më të lartë në historinë e boksit shqiptar.
Zëvendës Ministri i Sporteve Endrit Hoxha thotë se qeveria shqiptare tashmë ka ndryshuar qasje sa i përket mbështetjes financiare për sportistët.
Për babain e nënkampionit Maca tashmë nuk ka kthim pas, do vijojë që boksieri i talentuar të jetë pjesë e Shqipërisë.
Adam Maca arriti deri në finalen e kampionatit botëror për 16 vjeçarët në Armeni ndërsa në finale edhe pse bëri një ndeshje dinjitoze nuk arriti të shpallet fitues. 16 vjeçari është një boksier premtues në të ardhmen.
