Presidenti ukrainas, Volodymyr Zelensky ka reaguar ashpër për ngjarjen e ndodhur në Bucha, ku rusët kanë vrarë me qindra civilë të pafajshëm. Trupat e pajetë të shtrirë rrugëve bënë xhiron e botës, ndërsa Zelensky e quajti gjenocid. Madje, në një postim në Telegram, presidenti i Ukrainës ka shkruar: “Nënat e ushtarëve rusë, shikoni çfarë rritët”, ndërsa fajësoi edhe Perëndimin, i cili nuk e pranoi anëtarësimin e Ukrainës në NATO në 2018.
“Nënat e ushtarëve rusë duhet ta shohin këtë. Shikoni çfarë keni rritur. Vrasës, grabitës, kasapë” , ka shtuar ai, ndërsa ka publikuar edhe foto nga mizoritë e ndodhura në qytetin pranë Kievit.
Zelensky foli më herët për gjenocid në Ukrainë. “ Është me të vërtetë një gjenocid. Shfarosja e të gjithë kombit dhe popullit,” tha Zelensky.
“Ne jemi qytetarë të Ukrainës dhe nuk duam t’i nënshtrohemi politikës së Federatës Ruse. Për këtë arsye po na shkatërrojnë”, shtoi ai.
