Në komisionin parlamentar të sigurisë ku u diskutua projektligji për amnistinë, deputetët e Partisë Socialiste, përmes pyetjeve drejtuar zëvendës ministrit të Drejtësisë Klajd Karameta, propozuan mundësinë e zgjerimit të veprave penale të përfshira në amnisti.
‘Disa vepra penale siç është peshkimi i ndaluar. Nëse është i dënuar ju i amnistoni, nëse është në ndjekje penale për peshkim të ndaluar, nuk e amnistoni. Apo prerje të paligjshme të pyjeve. Nëse është i dënuar amnistohet, nëse është në ndjekje penale ku parashikohet deri një vit nuk amnistohet.’- tha Nasip Naço.
Ndërsa deputeti Bujar Çela tha se duhet të amnistohen edhe ata që dënohen me gjoba për ndërtime pa leje.
‘Nuk mund të qëndrojnë arrest shtëpie dy persona të zënë me grushte në avujt e alkoolit të vijojnë arrest shtëpie. Edhe ata për ndërtime pa leje dhe detyrim paraqitje. Në këtë spektër a nuk mund të zhvillohej edhe çështja, se dënim është edhe gjoba për disa ndërtime pa leje, duke ndërtuar kasolle, shtesa banjo, avulli për të sistemuar familjet, nuk kuptoj dot pse nuk janë përfshirë edhe ata që janë me detyrim paraqitje.’- tha Çela.
Deputeti Denis Deliu kërkoi zgjatje të afatit të amnistisë deri më 31 Dhjetor 2023 nga 30 Nëntor 2023 dhe u kërkoi deputetëve të opozitës që të gjejnë gjuhën dhe të bashkohen e të votojnë së bashku këto nisma të mëdha.
