Rritja e numrit të vizitorëve vendas dhe të huaj në Parkun Natyror të Thethit ka evidentuar disa problematika të cilat nuk kanë marrë ende zgjidhje nga institucionet. Drejtori I Administratës së Zonave të Mbrojtura për qarkun Shkodër, Agim Dardha thotë se turizmi masiv në Theth shkakton probleme me parkingun e mjeteve private duke bllokuar lëvizjen e vizitorëve ndaj bashkia Shkodër dhe agjencitë turistike që operojnë atje duhet të krijojnë mundësinë e lëvizjes me transport publik.
Gjatë kësaj periudhe, parku natyror I Thethit vizitohet mesatarisht nga 1 mijë turistë në ditë, një shifër kjo e kënaqshme që premton shumë për sezonin turistik që sapo ka nisur.
Parku Natyror I Thethit është një nga destinacionet më të vizituara në këtë periudhë. Turistët zgjedhin ekspeditat në shtigje të ndryshme për të njohur më nga afër bukuritë natyrore të Alpeve Shqiptare.
