Prokuroria e Posaçme SPAK, ka dyshime se anëtarë të organizatës MEK të vendosur në kampin “Ashraf 3” në Manzë kanë kryer pesë vepra penale, mes të cilave edhe “provokimi i luftës”. Sipas SPAK, dyshohet se organizata “MEK”, e vendosur në Manzë, ka kryer sulme kibernetike ndaj Republikës Islamike të Iranit në disa periudha të ndryshme kohore, si edhe ndaj institucioneve në shtetin iranian. Duke qenë se statusi i organizatës MEK në Shqipëri është humanitar, Republika Islamike e Iranit në vazhdimësi ka pretenduar duke ngritur këto dyshime si dhe në mënyrë të vazhdueshme kërcënon se do të ndërmarrë sulme ndaj Shqipërisë dhe organizatës MEK
Duke nënvizuar sulmet kibernetike të Iranit drejt Shqipërisë në vitin 2022, SPAK thekson se bazuar në monitorimin e rrjeteve sociale, në fund të vitit të kaluar u konstatua një rritje e retorikës kërcënuese nga Irani dhe inteligjenca për sulme të mundshme, përfshirë edhe për sulme me dron ndaj organizatës MEK në Manzë. Veprat penale që dyshohet të jenë kryer nga kampi i muxhahedinëve në Manzë janë “provokimi i luftës”, “përgjimi i paligjshëm i të dhënave kompjuterike”, “ndërhyrje në të dhënat kompjuterike”, “ndërhyrje në sistemet kompjuterike dhe “keqpërdorim i pajisjeve”.
Bazuar në të dhënat e servirura nga SPAK, gjykata ka vlerësuar të lejojë kontrollin e vendqëndrimit të muxhahedinëve në Manzë me qëllim gjetjen e serverëve apo pajisjeve të tjera kompjuterike që mund të jenë përdorur për sulmet kibernetike nga territori i Shqipërisë. Nga ana tjetër, sipas SPAK, ka dyshime se pjesëtarë të MEK në Manëz janë të përfshirë në aktivitet kriminal të terrorizmit dhe financimit të terrorizmi.
