Gjermania ka shkatërruar 3-0 Sllovakinë, përballë së cilës regjistronte edhe humbjen më të fundit në miqësoren e luajtur gjatë fazës përgatitore më 25 maj.
Ekipi i drejtuar nga Joachim Loew ka dominuar totalisht lojën duke kaluar në avantazh që në minutën 8’ me anë të Boateng. 7 minuta më pas Ozil ka pasur mundësinë të dyfishojë rezultatin, pas një penalltie të akorduar nga arbitri polak Szymon Marciniak, por gjuajtja e tij është pritur nga portieri Kozacik. Por ai që dyfishoi shifrat në pjesën e parë ka qenë Mario Gomez, i cili ka shfrytëzuar mjaft mirë mundësinë e dhënë në minutën 42’ dhe nuk ka falur. Edhe në pjesën e dytë është parë një Gjermani e frikshme, duke shënuar sërish në minutën e 63’ me anë të Draxler. Tashmë gjermanët kanë sytë nga “Stade de France”, kur nesër do të luhet edhe supersfida Itali-Spanjë, për të mësuar rivalin e parë të frikshëm për të në këtë Europian.
