Me 13 vota pro dhe 1 abstenim, Këshilli Bashkiak i Hasit shpalli Gafurr Mazrrekun Qytetar Nderi të Hasit, me motivacionin “Personalitet Intelektual, per kontributin e pashoq ne Pushtetin Vendor”.Vendimi eshte kundershtuar nga Keshilltaret e djathtë.
Miftar Dauti, Kryetar i Këshilltarëve të djathtë: Vendimi është i jashtëligjshem pasi vendimi është marrë pa prezencen e këshilltarëve të djathtë. Në kerkuam 5 minuta pushim për konsultime, ndërkohe këshilltarët e majtë e kanë miratuar propozimin e administratës së bashkisë. I bëj thirrje prefektit që të mos e miratojë këtë vendim.
Gafur Mazreku me 18 shtator të vitit 1997 brenda ambienteve të Parlamentit të Shqipërisë, pas një sherri verbal dhe më pas fizik me deputetin Azem Hajdari e plagosi ate me arme zjarri.
Mazreku u arrestua dhe gjykata e dënoi me 12 vite burg. Amnistitë e herëpashershme, e ulën dënimin për Mazrekun, i cili lirohet në vitin 2001, tre vjet pasi ishte dënuar.
Në pranverën e vitit 2002 zgjidhet unanimisht kryetar i PS-së Has, dhe në vitin 2005 ai ndahet nga jeta pas një infarkti.
Partia Demokratike ka dënuar vendimin e këshilltarë të PS në bashkinë e Hasit për t’i dhënë titullin “Qytetar Nderi” ish-deputetit Gafur Mazreku, i cili në 1997 plagosi Azem Hajdarin në seancën e Parlamentit.
Në një dalje për mediat nga selia blu, deputeti Gent Strazimiri akuzoi drejtpërdrejt kryeministrin Rama për marrjen e këtij vendimi kriminal sic e quajti ai.
Deklarata e Gent Strazimirit
Në një akt të pashembullt dhe kriminal, Edvin Kristaq Rama shpalli sot Qytetar Nderi të Hasit atentatorin e Liderit të Lëvizjes së Dhjetorit Azem Hajdari.
Vendimi i përfaqësuesve të Edi Ramës në Këshillin Bashkiak të Hasit u mor 3 ditë pasi Partia Demokratike i bëri thirrje Kryetarit të Partisë Socialiste të Shqipërisë të ndalojë vendimmarrjen kriminale të këshilltarëve, të cilët janë plotësisht nën kontrollin e tij.
Prandaj, Edvin Kristaq Rama nuk fshihet dot sot dhe as mund të lajë duart si Pilati!
Partia Demokratike e konsideron atë vetë, autorin e vendimit kriminal që nderoi me titullin më të lartë atentatorin e Tribunit të Demokracisë Azem Hajdari, që bashkë më studentët dhe qytetarët e Tiranës, rrëzuan regjimin e etërve të këtyre që drejtojnë sot vendin.
Vendimi për të nderuar vrasësin e Azem Hajdarit është gjest revanshi i bijve të kupolës së bandës së xhahilëve, që sundoi për 46 vjet mbi gjakun e këtij populli;
Është vendim i Edvin Kristaq Ramës, i Ditmir Sulejman Bushatit, i Ilir Hamit Beqjes, i Ministrit të Brendshëm të Ramiz Alisë, Gramoz Ruçi, i hetuesit torturues të komunizmit kundër Lëvizjes Studentore Fatmir Xhafaj, e i sa e sa të tjerëve, oficerë Sigurimi e persekutorë e vrasës, të genit më të mirë të këtij kombi.
Vendimi i Edvin Kristaq Ramës për të nderuar atentatorin e Azem Hajdarit është:
• Rilindje e mëkateve, krimeve monstruoze, perversitetit, injorancës
• Rilindje e së shkuarës më të përgjakshme të këtij vendi.
• Rilindje e anti-Evropës, anti-Amerikës, anti-Perëndimit, i ‘politikës’ së etërve.
• Rikonfirmim i politikës së kriminelëve dhe kriminalizimit deri në memorie.
Edvin Kristaq Rama që sot përpiqet të lajë duart si Pilati, është urdhërdhënësi, frymëzuesi dhe projektuesi i këtij vendimi kriminal, që rrënon çdo shpresë për rikthimin e një situate normale politike në vend.
Është ai, i njëjti, që ne cilësinë e Kryebashkiakut të Tiranës, e njëkohësisht të kreut të PS, refuzoi 2 m2 vend për bustin e Azem Hajdarit, duke e konsideruar atë “ndërtim pa leje”!
I biri i vrasësit të Havzi Nelës, duhet ta dijë se po shkon me shpejtësi drejt një, dhe vetëm një fundi të pashmangshëm, fund në të cilin do ta marrë përgjigjen, në emër të të gjallëve dhe të të vdekurve të kësaj partie, e që po e kërkon me ngulm!
