Një gjykatës federal në Havaji të Shteteve të Bashkuara zgjati për kohë të pacaktuar një vendim të mëparshëm të tij për pezullimin e ndalesave të udhëtimit, të urdhëruara nga presidenti Donald Trump.
Vendimi i gjykatësit Derrick Watson do të thotë se Trump nuk mund të zbatojë urdhrin për qytetarët e gjashtë vendeve me shumicë myslimane, derisa ai kontestohet në gjykatë. Pasi dëgjoi argumentet nga avokatët e shtetit të Havajjit dhe zyrtarët e Departamentit amerikan të Shtetit, gjykatësi Watson tha se ndalesat në udhëtime do të dëmtonin turizmin dhe mundësinë për të pranuar studentë dhe punëtorë të huaj. “Vendimi i gjykatësit Watson është një pohim i vlerave të lirisë fetare dhe u mundëson të gjithë myslimanëve dhe refugjatëve të përballen me më pak pasiguri”, tha Zyra e Prokororit të Përgjithshëm të Havajit. Presidenti Trump thotë se urdhri i tij ka për qëllim të parandalojë terroristët të hyjnë në SHBA. Urdhri i pezulluar, i nënshkruar më 6 mars, ka qenë rishikim i urdhrit fillestar të Trumpit, të nënshkruar më 27 janar, i cili u ka ndaluar hyrjen në SHBA vizitorëve nga shtatë vende me shumicë myslimane dhe individëve me dokumente valide të qëndrimit dhe viza.
Vendet e prekura në urdhrin e rishikuar janë Irani, Siria, Sudani, Somalia, Libia dhe Jemeni, ndërsa është hequr Iraku. Edhe urdhri i rishikuar, edhe urdhri fillestar u kanë ndaluar hyrjen në SHBA të gjithë refugjatëve. Pasi është sfiduar në gjykata, presidenti Trump është ankuar për, siç ka thënë, “humbje të paparë të ekuilibrit gjyqësor”, dhe ka thënë se do ta çojë rastin edhe në Gjykatën Supreme, nëse është e nevojshme. Urdhri i rishikuar është sfiduar edhe në disa shtete të tjera. Në shtetin Merilend, për shembull, është bllokuar pjesa e urdhrit që prek vizat, por jo edhe ajo që ka të bëjë me kufizimet për refgjatët. Organizata për të drejtat e njeriut, Amnesty International, e cilësoi vendimin e fundit të gjykatësit Watson si goditje të re mbi, siç tha, veprimet kontroverse të presidentit. “Gjykatat përsëri e hodhën poshtë ndalesën ndaj myslimanëve. Sikurse ndalimi i mëparshëm i udhëtimit, edhe urdhri i ri është paturpshëm diskriminues”, tha Margaret Huang, drejtore ekzekutive e Amnesty International në SHBA. “Presidenti Trump duhet ta brakstisë këtë agjendë të dështuar dhe ta tërheqë ndalimin”, shtoi ajo. Kryetari i Dhomës së Përfaqësuseve, Paul Ryan, ka thënë më herët se ndalesa është e nevojshme për të përmirësuar verifikimin e njerëzve që hyjnë në SHBA dhe për të parandaluar sulmet terroriste. Ai ka thënë se nuk ka dyshim se ajo do të vërtetohet nga gjykatat më të larta.
