Goditi infermierin, arrestohet 30-vjeçari
Një 30-vjeçar është arrestuar nga Policia e Durrësit pas incidentit të ndodhur në ambientet e spitalit rajonal të këtij qytetit. Altin Allka, me banim në Durrës u arrestua nën akuzën e goditjes për shkak të detyrës të një infermieri 38-vjeçar dhe shkatërrimit të pronës publike. Një ditë më parë nipi 6-vjeçar i Allkës është aksidentuar nga një motoçikletë. I tensionuar nga ngjarja dhe gjendja e nipit, 30-vjeçari ka goditur me grushte një nga infermierët në shërbim dhe derën e sallës së operacionit. Burime policore bënë të ditur se fëmija është në gjendje të mirë shëndetësore, ndërsa ndaj drejtuesit të motoçikletës ka nisur procedim penal në gjendje të lirë.
