Bordi ekzekutiv i UNESCO-s ka miratuar një rezolutë të re që kritikon veprimet e Izraelit në Jerusalemin e pushtuar dhe në Rripin e Gazës, ndërsa udhëheqësit palestinezë e përshëndesin këtë veprim si “një hap përpara” dhe një “fitore për të drejtën ndërkombëtare”.
Rezoluta e konsideron të pavlefshëm sovranitetin e Izraelit mbi Jerusalemin, ndërsa u mbështet nga 22 vende. Shtetet e Bashkuara, Gjermania, Italia dhe shtatë anëtarë të tjerë të bordit votuan kundër rezolutës, ndërsa pro votuan Rusia, Kina, Brazili, Suedia, Afrika e Jugut, Irani, Malajzia, Mauritiusi, Nigeria, Senegali, Bangladeshi, Pakistani, Vietnami, Nikaragua, Çadi dhe shtatë vende arabe. Rezoluta vjen ditën e pavarësisë së Izraelit.
Ministri i Jashtëm palestinez Riyad Malki përshëndeti rezultatin e votimit, duke thënë se bota kishte zgjedhur të “qëndronte në anën e asaj që është e drejtë përballë [padrejtësisë të] Izraelit, okupimit dhe politikave të tij të paligjshme”. Rezoluta i bën thirrje Izraelit, si “pushteti pushtues”, të ndërpresë “gërmimet e vazhdueshme, tunelet, punimet dhe projektet në Jerusalemin Lindor”, të cilin palestinezët dëshirojnë ta kenë kryeqytetin e shtetit të tyre të ardhshëm.
Ajo riafirmon “rëndësinë e qytetit të vjetër të Jerusalemit dhe mureve të tij për tre fetë monoteiste“, duke e akuzuar Izraelin se ka ndërmarrë veprime që kanë “ndryshuar ose kanë për qëllim ndryshimin e karakterit dhe statusit të Qytetit të Shenjtë”. Rezoluta, e cila ka formulimin më të butë se një vendim tjetër i UNESCO-s vitin e kaluar, gjithashtu kritikon Izraelin për bllokadën e saj në Rripin e Gazës të drejtuar nga Hamasi.
