Mund të duket e çuditshme por jo të gjithë politikanët kanë raporte të mira me teknologjinë.
Një prej tyre është dhe Jean-Claude Juncker, kryetari i Komisionit Evropian, i cili deklaroi të premten se nuk ka smartphone. “Nuk duhet ta thoja, por unë do të tregoj që ende nuk kam një smartphone”, tha 62-vjeçari në një konferencë shtypi.
Rrëfimi erdhi në një konferencë për media në Bruksel, së bashku me kryeministrin e Estonisë, Juri Ratas, vendi i të cilit nga 1 korriku merr presidencën e radhës së BE-së.
Juncker, duke bërë shaka, tha se Ratas i ka dërguar ftesë për të shkuar në Talin në formë të kartolinës, “sikurse në shekullin 19”. Sipas burimeve të BE, telefoni që përdor Juncker është një celular i vjetër Nokia.
Shefi i BE-së është ish-kryeministër i Luksemburgut, por tha se me tendenca të tilla teknikofobe, ai “nuk mund të bëhej Kryeministër i Estonisë, do të ishte krejtësisht e pamundur”. Estonia është një nga vendet më digjitale në botë dhe vendi i parë që ka prezantuar votimin në internet.
Ajo shpreson të shtyjë përpara çështjet dixhitale gjatë presidencës 6 mujore të BE-së, drejtimin e së cilës e merr nga sot, 1 korrik 2017. Megjithatë, Juncker nuk është zyrtari i parë i lartë që i reziston teknologjisë së avancuar. Kancelarja gjermane, Angela Merkel, e cila është në pushtet që nga viti 2005, nuk ka ende llogari në Twitter.
