Dje rreth orës 17:30, një kontratë e firmosur nga “Fly Ernest” bëri të mundur që udhëtarët që kishin mbetur të bllokuar në aeroportin e Rinasit të niseshin drejt destinacioneve të tyre. Kjo u konfirmua këtë mbrëmje nga Krislen Keri, drejtor i Autoritetit shqiptar të Aviacionit Civil.
Drejtori i Aviacionit theksoi se strukturat janë duke punuar me orare të zgjatura për të bërë të mundur që të firmosen nga Fly Ernest kontrata të tjera të ngjashme me atë që u firmos sot, për të dërguar në destinacion udhëtarët që kanë prerë biletat deri më 13 janar.
Krislen Keri tha se është Autoriteti italian i Aviacionit Civil që ka vendosur për pezullimin e lincencës së kompanisë ajrore, për shkak të detyrimeve financiare. Më datë 13, italianët do të marrin vendimin përfundimtar për Fly Ernest, në bazë të reagimit të tyre ndaj detyrimeve financiare.
