Jo vetëm Kolumbia por edhe Ekuadori është një tjetër destinacion nga ku grupet kriminale shqiptare blejnë kokainën. Mësohet se policia e Ekuadorit ka sekuestruar 4 ngarkesa më Kokainë të cilat kishin si destinacionin final portin e Durrësit.
Dy operacione janë zhvilluar gjatë vitit 2014, një në 2015 dhe një tjetër në 2016. Për të katra këto operacione është njoftuar policia shqiptare por nuk janë identifikuar porositësit dhe pritësit e kokainës.
Në këto katër operacione policia e Ekuadorit ka sekuestruar në total 317 kg kokainë të pastër me destinacion Shqipërinë.
Sipas informacionit të dhënë nga policia e Ekuadorit, në operacionin e datës 24 Nëntor 2015 i quajtur Roof (Catia) në një kontenier të mbushur me banane u gjetën 82 pako kokaine me peshë 93 kile. Droga ishte e fshehur në tavanin e kontenierit. Destinacioni final ishte Durrësi.
Operacioni nga policia e Ekuadorit në 24 Nëntor 2015, u kapën 93 kg kokainë
Në vijim të këtij operacioni autoritetet ekuadoriane zbuluan se cila ishte kompania që kishte të porositur sasisë e banave në kontenierin e të cilës u gjetën 93 kg kokainë.
I përkiste Arbri Garden dhe për këtë u njoftuan autoritetet shqiptare të cilat nisën një hetim duke marrë në pyetje pronarin e kompanisë Arbër Cekaj.
Sipas prokurorisë së krimeve të rënda çështja u pezullua pasi nuk ka mbërritur ende nga Ekuadori letër porosia e dërguar për llogari të hetimeve në Shqipëri.
Për herë të parë alarmin se grupet kriminale shqiptare kishin vendosur kontakte me kartelet e drogës në Ekuador e dha Jay Bergman, Drejtor i DEAS për Amerikën Latine i cili deklaroi se : Ekuadori po kthehet në kombet e bashkuara të krimit të organizuar .
Duke u ndalur në grupet kriminale shqiptare ai tha se ato operonin nga qyteti Quito.
Tre vite më vonë nga kjo deklaratë e drejtorit të DEA, pikërisht më 9 Nëntor 2014 sekuestrohen në një kontenier 34 kg kokainë me destinacion final portin e Durrësit.
Sipas njoftimit të policisë në portin e Guayaquil gjatë një operacioni anti drogë në një kontenier me destinacion Shqipërinë, në mes të panelëve ftohës u zbuluan 29 pako që mbanin 34 kg kokainë. Për këtë u arrestua shtetasi ekudarian Daniel. G. S.
Më 18 Maj 2014 Policia Nacionale e Ekuadorit do të njoftonte finalizimin e operacionit të koduar Arcano ku kapën 89 kile kokainë. Përsëri destinacioni final porti Durrësit.Operacioni nga policia e Ekuadorit në 18 Maj 2014, u kapën 89 kile kokainë
Një tjetër operacion ai i datës 24 Prill 2016 në brendësi të portit të Guayaquil u sekuestruan 102 kile kokainë. Droga ishte e fshehur në tavanin e kontenierit dhe ishte gati për tu ngarkuar në anije. Edhe ky kontinier me banane kishte destinacionin portin e Durrësit.
Operacioni nga policia e Ekuadorit në 24 Prill 2016, u kapën 102 kg kokainë
Këto janë vetëm katër rastet e identifikuar nga policia e Ekuadorit ku kokaina kishte si destinacion Shqipërinë që tregojnë se marrëdhëniet e grupeve kriminale shqiptare me këtë vend janë të konsoliduara.
Megjithëse është zbuluar si destinacion final Shqipëria, asnjë shtetas shqiptarë nuk është arrestuar deri më tani.
Kapja e sasisë rekord prej 613 kg në magazinën e kompanisë Arbri Garden është vetëm maja e Aisbergut e trafikut të kokainës nga Amerika Latine drejt Shqipërisë.
