Të paktën 17 qytetarë në qarkun Shkodër dyshohet se kanë votuar 34 herë në zgjedhjet parlamentare të 25 prillit në qendra të ndryshme votimi. Ky konfirmim vjen nga Komisioni Qëndror i Zgjedhjeve pas një kërkese që ka bërë Komisioni i Ankimeve dhe Sanksioneve në KQZ.
Pas kërkesës së KAS, administrata e KQZ ka zbardhur përmes kryqëzimit të të dhënave nga pajisja e identifikimit elektronik (PEI) se në zgjedhjet e 25 Prillit, në Qarkun Shkodër, 17 qytetarë dyshohet se kanë votuar 34 herë në qendra të ndryshme Votimi.
Bazuar në të dhënat e detajuara që ofrohen në tabelë, një person ka votuat 7 herë. Dy anëtarët e KAS Ledio Braho dhe Elvis Çefa kërkuan këtë informacion. Ndërkohë gjatë mbledhjes të Komisionerit Shtetëror të Zgjedhjeve, Gledis Çeliku i PSD nuk ka dorëzuar vetëdeklarimin në këtë mënyrë nuk do të mund të ushtrojë mandatin e deputetit për legjislaturën e 2017-ës që vijon deri më 8 korrik, pra edhe rreth dy muaj.
Gledis Çeliku ishte edhe në 2017-ën i dyti në listë si kandidat për deputet i PSD. Pas dorëheqjes së Tom Doshit edhe si deputet i legjislaturës së 2017-të, mandatin për këto dy muaj duhej ta merrte Gledis Çeliku por nuk dorëzoi vetëdeklarimin. Çeliku do jetë deputet në legjislaturën e ardhshme 2021-2025 duke qenë se PSD mori dy deputetë dhe i dyti në listë ishte pikërisht Gledis Çeliku.
