Kriminelët shqiptarë janë mjaft aktiv dhe kanë rol udhëheqës në krimin e organizuar në Amsterdam. Ky është përfundimi i dalë nga një analizë e Policisë së Amsterdamit në Holandë.
Sipas autoriteteve, shqiptarët në Amsterdam janë të angazhuar kryesisht në trafikun e kokainës, por edhe në kontrabandimin e qenieve njerëzore dhe mashtrimet me shit/blerjet e pronave.
Në analizën e policisë thuhet se grupet kriminale shqiptare importojnë kokainën nga vemdet e Amerikës së Jugut nëpërmjet portit të Roterdamit dhe më pas nga Amsterdami shpërndahet në vendet e tjera të Evropës. Përveç Holandës, theksohet se shqiptarët janë shumë aktivë dhe trafikun e drogës në Britani të Madhe.
Numri i shqiptarëve në Amsterdam të përfshirë në krime vazhdon të rritet, evidentohet në raport.
Një problematikë serioze janë edhe vrasjet, kryesisht për prishje të pazareve të drogës. Përdorimi i armëve të zjarrit, kryesisht armët automatike që importohen nga Ukraina, Siria, Mali, Libia dhe Rusia, përbëjnë një tjetër shqetësim.
Vrasjet e viteve të fundit në Amsterdam, thotë policia, janë të lidhura kryesisht me tregtinë e kokainës.
“Këto vrasje zakonisht kryhen nga banorët e rinj të Amsterdamit dhe viktimat zakonisht janë gjithashtu banorë të tij”, thuhet në analizën e policisë, ku evidentohet gjithashtu se këto krime bëhen nga vrasës me pagesë.Ekziston një rrjet i gjerë ndërmjetësish dhe ekzekutorësh, sipas raportit të Policisë së Amsterdamit.
Më herët gjatë këtij viti, shefi i policisë në këtë qytet, Pieter – Jaap Aalbersberg ngriti shqetësimin se po shtohen vrasësit me pagesë, që janë kryesisht amatorë dhe që pranojnë të vrasin dikë për më pak se 3 mijë Euro.
