NUK KA ASNJË VEPRIM KONKRET, RIKONSTRUKTOHET “QEMAL STAFA”. Premtimi i bërë nga Kryeministri i Shqipërisë Edi Rama për rikonstruksionin e stadiumit “Loro Boriçi” dhe që do të ishte i gatshëm për ndeshjen e kthimit Shqipëri-Serbi, duket se është lënë plotësisht në harresë.
Kur kanë kaluar më shumë se tre muaj dhe në janar të këtij viti ishte pritur fillimi i punimeve, asgjë nuk ka ndodhur deri tani. Siç shikohet dhe nga pamjet, “Loro Boriçi” vijon të mbetet në vend numëro përsa i përket kësaj çështjeje. Madje u mendua se ai mund të rikonstruktohej shumë shpejt. Kio për shkak se gjatë muajit tetor të vitit 2014, një kompani erdhi në Shkodër për të bërë matjet topografike të stadiumit. Po ashtu u tha se duhej të përfundonin shumë shpejt matjet në mënyrë që të bëhej projekti i ri. Në zyrat e klubit të Vllaznisë, apo Bashkisë së Shkodrës nuk ka asnjë informacion për këtë pjesë, ç’ka bën të jetë më shumë një flluskë sapuni. Të gjithë pyesin a do të bëhet apo jo rikonstruksioni i stadiumit “Loro Boriçi”, por askush nuk jep asnjë përgjigje. Ndërkohë, në media të ndryshme po qarkullojnë disa aludime se “Loro Boriçi” nuk do të rikonstruktohet, kjo për arsyen se në stadiumin e kryeqytetit “Qemal Stafa” madje dhe në stadiumin “Selman Stermasi” ka filluar puna për rikonstruksionin e tapetit të blertë. Nga mediat në Tiranë, rikonstruksioni i fushës në “Qemal Stafa” është lënë plotësisht në hije, ndërsa thuhet se brënda pak ditësh fusha do të jetë gati për zhvillimin e ndeshjeve për ekipet e Tiranës dhe të Partizanit. Me të drejtë lind pyetja, mos Shkodra ka kaluar sërish në plan të dytë? Këtu ngrihen dhe më shumë dyshime, sepse në qoftëse “Loro Boriçi” do të rikonstruktohej, punimet duhej të kishin filluar me kohë, pasi deri në Tetor të vitit 2015 ku do të zhvillohet ndeshja e kthimit Shqipëri-Serbi, mbetet shumë pak kohë në dispozicion.
