Forcat ruse vijojnë luftën në disa rajone të Ukrainës të hënën, ndërsa Presidenti Volodymyr Zelensky paralajmëroi për mundësinë e sulmeve serioze përpara 31 vjetorit të pavarësisë së Ukrainës nga sundimi sovjetik.
Predha artilerie ranë mbi Nikopol, një qytet pranë Zaporizhzhia – centrali bërthamor më i madh në Evropë, ndërsa disa raketa goditën zonat pranë portit të Odesës në Detin e Zi gjatë fundjavës.
Zelensky bëri thirrje për vigjilencë, duke thënë se Moska mund të bëjë “diçka veçanërisht të shëmtuar” përpara të mërkurës, e cila shënon Ditën e Pavarësisë së Ukrainës dhe gjithashtu gjysmë viti nga kur Rusia pushtoi Ukrainën më 24 shkurt.
Zelensky tha se ai kishte diskutuar “të gjitha rreziqet” me presidentin francez Emmanuel Macron dhe se fjalë u ishte dërguar gjithashtu liderëve të tjerë, përfshirë presidentin turk Tajip Erdogan dhe Sekretarin e Përgjithshëm Antonio Guterres.
Në Rusi, autoritetet po hetojnë një sulm të dyshuar me bombë në makinë jashtë Moskës që vrau vajzën e Alexander Dugin, një ideolog rus ultra-nacionalist që mbron luftën e Rusisë në Ukrainë.
Ndërsa hetuesit thanë se po shqyrtonin “të gjitha versionet” kur bëhej fjalë për të përcaktuar se kush ishte përgjegjës, Ministria e Jashtme ruse spekuloi se mund të kishte një lidhje me Ukrainën, diçka që një këshilltar i Zelensky-t e hodhi poshtë.
Ndërsa Ukraina përgatitet të shënojë Ditën e Pavarësisë, e përfshirë në një luftë që ka rrafshuar shumë qytete, ka vrarë mijëra dhe ka detyruar miliona të largohen, zyrtarët raportuan më shumë sulme ruse ndaj objektivave në lindje dhe jug të vendit.
