Ministri i Arsimit i Libisë u arrestua të hënën si pjesë e një hetimi për mungesën e teksteve shkollore, tha shërbimi i prokurorisë.
Moussa al-Megarief “u vendos në paraburgim parandalues në pritje të një hetimi për neglizhencë (të mundshme)”, thuhej në deklaratë.
“Prokuroria Publike ka nisur një hetim për të përcaktuar rrethanat rreth procedurave kontraktuale për shtypjen e teksteve shkollore dhe arsyet e mungesës”, thuhej më tej në njoftim.
Në kuadër të këtij hetimi janë ftuar për të dëshmuar edhe shumë zyrtarë të tjerë, mes tyre edhe ministri i Planifikimit.
Libianët po përjetojnë efektet e krizës politike që ka kapluar vendin që nga rënia e regjimit të Muamar Gadafit në 2011. Monedha vendase është zhvlerësuar, ndërprerjet e energjisë elektrike janë një problem kronik dhe radhët në banka dhe pika karburanti janë të pafundme.
Prej javësh prindërit e nxënësve nuk kanë zgjidhje tjetër veçse të përdorin fotokopje në vend të librave.
“Unë kam tre fëmijë në shkollën fillore dhe më kushton qindra dinarë për të bërë fotokopje të të gjithë librave,” tha Zakiya Abdelsamad, një sekretare në një klinikë private në Tripoli.
Shumë librari në kryeqytet kanë përfituar nga situata dhe po shesin fotokopje të teksteve shkollore me çmime të larta, sipas një gazetari të agjencisë.
Qeveria libiane miraton çdo vit një buxhet vjetor për shtypjen e teksteve shkollore, të cilat shpërndahen pa pagesë në shkollat publike. Por këtë vit shuma është dhënë me vonesë, duke rezultuar në mungesë në fillim të vitit shkollor.
Para arrestimit, ministri i Arsimit ia atribuoi vonesën procesit të konsolidimit të përmbajtjes së kurrikulës shkollore në tre rajonet e Libisë (perëndim, lindje dhe jug).
Ministria i ka ngarkuar librat në format PDF në faqen e saj nga ku të interesuarit mund t’i shkarkojnë.
Arrestimi i ministrit vjen vetëm katër ditë përpara zgjedhjeve presidenciale që synojnë të mbyllin një fazë tranzicioni, por që pritet gjerësisht të shtyhet.
