Agjencia amerikane e hapësirës NASA prezantoi katër gra dhe gjashtë burra të cilët janë përzgjedhur si rekrutë astronautësh për t’u trajnuar për misionet e ardhshme.
Administratori i NASA-s Bill Nelson prezantoi anëtarët e klasës së astronautëve 2021, klasa e parë e re në katër vjet, pranë Qendrës Hapësinore Johnson të NASA-s në Hjuston.
Të 10 kandidatët e rinj për astronautët u zgjodhën nga një fushë prej më shumë se 12 000 kandidatësh, sipas një deklarate nga NASA.
“Sot ne mirëpresim 10 eksplorues të rinj, 10 anëtarë të gjeneratës Artemis, klasës kandidate për astronautët e NASA-s për vitin 2021’’, theksoi Nelson.
Dhjetë kandidatët i përkasin moshave nga 32 deri në 45 vjeç dhe vijnë nga shumë rajone të ndryshme të SHBA. Astronautët do të nisin trajnimin dy vjeçar në muajin janar.
Trajnimi i kandidatëve për astronautët ndahet në pesë kategori kryesore: funksionimi dhe mirëmbajtja e sistemeve komplekse të Stacionit Ndërkombëtar të Hapësirës, trajnimi i ecjes në hapësirë, zhvillimi i aftësive komplekse të robotikës, funksionimi i sigurt i një avion trajnimi T-38 dhe aftësitë gjuhësore në rusisht.
Kërkesat për një aplikim ishin: shtetësia amerikane, diplomë master në një lëndë të shkencave natyrore, të paktën dy vjet përvojë profesionale ose të paktën 1000 orë stërvitje fluturimi dhe një test fitnesi të suksesshëm.
