Një ditë pas votimit në parlament, ministrat e rinj do të betohen sot para presidentit Bajram Begaj. Ceremonia e betimit do të mbahet në orën 10:00 në ambientet e Presidencës.
Para Begajt do të betohen 3 emrat e rinj që i shtohen kabinetit ‘Rama’, ministri i Brendshëm Ervin Hoxha, ministri i Mbrojtjes, Pirro Vengu dhe ministri i Financave, Petrit Malaj.
Edhe Taulant Balla do të betohet pas shkarkimit si ministër i Brendshëm dhe marrjes së detyrës së re si ministër i Shtetit për Marrëdhëniet me Parlamentin.
Ndryshimet e reja në qeveri u votuan dje në Kuvend mes një situate të tensionuar. Përplasje në distancë qenë të herëpashershme me kryeministrin Edi Rama të rikthyer në Kuvend pas muajsh mungesë.
