Një person i shpallur në kërkim ndërkombëtar nga autoritetet italiane është vënë në prangat e policisë së Shkodrës.
Edmond Çomo, 42 vjeç, banues në Koplik, Malësi e Madhe u arrestua gjatë pasdites së djeshme, pas informacioneve të marra në rrugë operative nga policia. Ndaj tij u bë pasi Gjykata e Leçes në Itali ka lëshuar urdhrin e arrestit ndërkombëtar për veprën penale “Vjedhje me dhunë e kryer në bashkëpunim”.
Në shtetin italian 42-vjeçari njihet si anëtar i grupeve të rrezikshme të krimit të organizuar si dhe është i dënuar më parë po në këtë shtet. Ndalimi i tij nga ana e autoriteteve shqiptare u bë me qëllim ekstradimin drejt Italisë, ndërkohë që materialet në ngarkim të tij iu referuan Prokurorisë së Shkodrës për veprime të mëtejshme.
Ai akuzohet se ka grabitur pronarin e një restoranti në Leçe. Shqiptari ishte liruar nga burgu i Vogheras në muajin prill të vitit 2016, ku kishte shlyer dënimin prej 16 vite burg për trafik ndërkombëtar kokaine dhe përfshirjen në një shkëmbim zjarri në vitet ‘90.
I pa pajisur me dokumente italiane, ai qëndroi për një muaj në një qendër pritjeje për emigrantët në Torino pas daljes nga burgu, e më pas grabiti italianin dhe vendosi të kthehej në Shqipëri. 42-vjeçari është në pritje të një dënimi me 13 vite burgim nga një gjykatë në Reggio Calabria, për krime të kryera me porosi të organizatës famëkeqë mafioze “Ndrangheta”.
