Kryetari i Partisë së Lirisë, Ilir Meta ka zhvilluar një takim me ish-kryeministrin, Sali Berisha në selinë blu.
Takimi i tyre vjen një ditë pasi KQZ vendosi të regjistrojë grupimin e Alibeajt me logon e PD në zgjedhjet e 14 majit.
Gjatë ditës së djeshme Partia e Lirisë publikoi edhe listën e kandidatëve për Këshillin Bashkiak të Tiranës, teksa konfirmoi se do të mbështesë kandidatët e Primareve për kryetarë bashkie.
Nga ana e tij ish-kryeministri Berisha është në negociata me disa forca politike nga krahu i djathtë për të formuar një koalicion për zgjedhjet e 14 majit, ku do të mundë të regjistrojë edhe kandidatët e tij për kryetarë të bashkive dhe këshillave bashkiakë.
Kujtojmë se dje Meta deklaroi për të disatën herë radhazi se mbështet kandidatët e dalë nga Primaret, ndërsa theksoi faktin se Partia e Lirisë fokus të madh do ketë dhe te anëtarët për Këshillat Bashkiakë.
