Reagimet – PD-PS përplasen për rafinerinë e Ballshit pas shpërthimit
Partia Demokratike dhe mazhoranca kanë shkëmbyer akuza të ndërsjellta për ngjarjen e ndodhur në rafinerinë e naftës në Ballsh. PD hodhi dyshime se privatizimi i rafinerisë është bërë në mënyrë klienteliste, ku nuk zbatohet asnjë masë për sigurinë në punë. Ndërsa zv/kryeministri Peleshit tha se opozita e përdor ngjarjen thjesht për kapital politik. Pasi lanë dyert e spitalit ku vizituan 4 të plagosurit e ngjarjes së Ballshit, kryetari i opozitës Lulzim Basha dhe zv/kryeministri Niko Peleshi u përplasën me akuza për privatizimin e rafinerisë dhe kushtet e punës në të. Demokrati Basha shprehu dyshimet se privatizimi i rafinerisë është bërë në mënyrë klienteliste dhe nuk janë marrë masat për të zbatuar kushtet e sigurisë në punë. Basha: Kemi dyshime të mëdha për përfitimet e jashtëzakonshme dhe ku shkojnë këto përfitime, se qartësisht nuk kanë shkuar për të përmirësuar sigurinë në një uzinë që kishte 6 muaj pa u ndezur.Kemi dyshimet tona të mëdha përsa i përket shfrytëzimit pa asnjë kriter të krahut të punës, të naftëtarëve. Kemi përgatitur prej dy javësh një kërkesë për një komision hetimor për këtë çështje. Ngjarja e sotme e kthen me forcë në vëmendje të opinionit publik domosdoshmërinë për zbardhjen e kësaj afere. Ndërsa zv/kryeministri, Niko Peleshi, pasi i shprehu ngushëllimet familjes së vitiktimës, tha se politikanët i shfryëzojnë fatkeqësi të tilla për kapitale politike. Peleshi: Kjo është një ngjarje që nuk do të lihet pa u hetuar, kanë filluar hetimet. Informacionet e para janë për një aksident, por ne nuk nxitojmë që të japim konkluzione, të shpallim fajtor dhe të kapitalizojmë siç mund të bëjnë të tjerët mbi ngjarjet e rënda. Por në fund si Partia Demokratike po ashtu dhe mazhoranca garantuan se do të ndjekin në vijimësi çështjen dhe do të qëndrojnë pranë familjes së viktimës, të lënduarve dhe naftëtarëve.
