Deputeti i Partisë Demokratike Enkelejd Alibeaj u shpreh nga foltorja e Kuvendit se sot në ditën e fundit të komisionit të reformës zgjedhore i vetmi produkt është propoziimi i PD-së 5 muaj më parë.
Alibeaj shtoi se PD kërkon lista të hapura, gjë të cilën nuk e duan deputetë të parlamentit, të cilët sipas tij kanë frikë të përballen me qytetarët.
‘Nuk mund të mos e përshëndes rikthimin e normalitetit në parlament. Por duhet të jetë real. Anormaliteti vazhdon kur parlamenti hesht. Sot është dita e fundit e reformës zgjedhore. Duket qartë pakti dhe marrëveshja. Heshtja. Ky parlament e ka për detyrë të deklarojë edhe dështimin e reformës ku detyrën e keni ju për të nxjerrë në rend dite produktin e reformës projektligjin e propozuar nga PD, 5 muaj më parë. Ne kemi depozituar variantin tonë listat e hapura, Shqipëria një zonë, votimi numërim elektronik, vota e diasporës. Kërkesa ime për procedurë është që sot të marrim kurajë dhe të votojmë edhe kundër të flasim shqiptarëve ashtu siç duhet.
Të pranojnë pra që nuk duan listat e hapura, votën e diasporës, pranojnë pra që ti dhurojmë 6 mandate Edi Ramës me këtë sistem. Dhe të dalim pastaj përpara shqiptarëve. Kjo është një çështje që duhet të ndodh tani. Heshtja është pakt, pazar në kurriz të shqiptarëve. Për të mbrojtur listat e mbyllura. Bajlozat të rrinë këtu sepse kanë frikë. Deputetë që kanë frikë të përballen me qytetarët. T’i hapim letrat ta tregojmë se sa kurajozë jemi. Njofto që është depozituar ligji nga PD dhe të futet në procedura për listat e hapura, votim-numërim elektronik, votën e diasporës.’, tha Alibeaj.
