“Kryeneçja” është operacioni i finalizuar me sukses nga policia e Shkodrës ku ra në pranga Liza Bela Chiaravalle, 67 vjeçarja që është arrestuar për të disatën herë për shfrytëzim prostitucioni.
Bashkë me të u arrestuar edhe shtetasi Halil Bajraktari, 56 vjeç banues në Shkodër i dyshuar se ka kryer veprën penale ‘favorizim i prostitucionit’ ndërsa u procedua penalisht në gjendje të lirë 41 vjeçarja F.M e dyshuar se ka kryer veprën penale “ushtrim i prostitucionit”. Arrestimet e dy shtetasva Liza Bela dhe Halil Bajraktari kanë ardhur pas një hetimi proaktiv disa mujor i policisë vendore në bashkëpunim me prokurorinë e rrethit gjyqësor Shkodër duke finalizuar kështu operacionin “Kryeneçja” dhe duke shkatërruar këtë grup që shfrytëzonte femra për prostitucion kundrejt pagesave të ndryshme. Shtetasja Liza Bela në policinë e Shkodrës rezulton si banore e lagjes “Mark Lula”.
Në fakt banesën e saj, sipas burimeve në një bllok pallatesh e kishte marrë me qera me idenë për ta përdorur si vend për shfrytëzimin e prostitucionit. Aty dyshohet se ka dërguar femrat që rekrutonte dhe klientë të ndryshëm përkundrejt pagesave me para. Në fakt banesa e shtetases Liza Bela është në lagjen Rus në qytetin e Shkodrës. Burime pranë policisë bëjnë me dije se në disa raste 67 vjeçarja që u prangos ka marrë shtëpi me qera në lagje të ndryshme të Shkodrës duke i përdorur më pas për shfrytëzim prostitucioni. “Star Plus” pak kohë më parë transmetoi një kronikë ku një tjetër prostitutë rrëfeu historinë e saj duke treguar se si ushtron këtë profesion në mes të ditës në vende të ndryshme në qytetin e Shkodrës. Ky është rasti i dytë brenda pak ditësh çka tregon se prostituimi është kthyer në një fenomen shqetësues në Shkodër.
