Projekti për restaurimin total të Urës së Mesit është gati dhe zbatimi i tij pritet të nisë pas miratimit të fondit nga Ministria e Kulturës.
Po ashtu, buxheti i akorduar nga programi IPA 2017 do të shërbejë për restaurimin total të urës. Drejtoresha Rajonale e Kulturës Kombëtare në Shkodër Majlinda Laçaj thotë se projekti përfshin restaurimin e të gjitha elementeve të urës, ndriçimin e zonës përreth dhe vendosjen e stolave. Në prioritetet e Ministrisë Kulturës është përfshirë gjithashtu edhe Kalaja e Drishtit, restaurimi i së cilës do të nisë fillimisht me hapjen e rrugës në mënyrë që ky monument të bëhet akoma më i prekashëm për vizitorët. Ndërhyrjet në këto dy objekte historike mjaft të rëndësishme në qarkun Shkodër pritet të përfundojnë para vitit 2020, sipas objektivave të vendosur nga programi IPA.
