Vidhet një banesë në fshatin Nikël të Krujës. Autorët kanë marrë 5 mijë euro dhe orenditë e shtëpisë.
Pronari i banesës Besnik Elezi, emigrant në Greqi, para një jave kishte sjellë materialet dhe më pas ishte larguar sërish për në vendin fqinj, ndërsa ishte rikthyer mbrëmë, ku konstatoi vjedhjen.
Hajdutët kanë shqyer jastëkët ku kanë gjetur shumën prej 5 mijë eurosh, të cilat i kanë marrë dhe janë larguar bashkë me materialet e ndërtimit dhe dyshekun e krevatit. Daja i Besnik Elezit, thotë se dyshimet janë te njerëzit e afërt që kanë ditur lëvizjet.
“Kanë marrë cfarë kanë dashur, materiale dhe pajisje për ndërtim. Morën cfarë iu kanë pëlqyer, mbi një milionë lekë bënte vetëm gjeneratori. Hoqën të gjitha pajisjet, dhe i çmontuan, morën edhe frigoriferin.
Morën edhe dyshekun e krevatit pasi mendonin se ka lekë. Porta kryesore nuk është hapur fare, prenë telat dhe më pas i lidhën prapë. Vjedhjen e konstatoi mbrëmë Besniku në orën 12:00 të natës kur erdhi nga Greqia. Kur pa portën e shtëpisë të thyer lajmëroi policinë.
Ata (autorët) kanë punësuar me qetësinë më të madhe. Dyshoj se ka ndërhyrje të afërt, mund të ketë persona që e kanë njohur shumë mirë gjendjen këtu dhe punuan me qetësinë më të madhe.
Nipi i solli materialet nga Greqia” tha daja i pronarit të banesës. Gazetari i Report Tv, Julian Shota thekson se kohët e fundit vjedhjet dhe grabitjet në rrethin e Krujës janë shtuar ndjeshëm por nuk raportohen nga policia.
