Kjo e martë ka rikthyer motin e keq me stuhi shiu në Qarkun e Lezhës, duke sjellë dhe problematika.Prej mbrëmjes të së hënës, kapiteneria e portit të Shëngjinit ka pezulluar lundrimin detar për anijet vogla dhe ata të peshkimit, për shkak të detit të trazuar.Sipas të dhënave zyrtare forca e detit ka arritur 6 deri në 7 ballë, ndërsa lartësia e dallgëve shkon deri në 2 metra, çka përbën rrezik për lundrim.Ndërkohë reshjet e shiut, kanë rritur nivelin e prurjeve në lumenj Drin,Gjader dhe Mat, por aktualisht nuk përbëjnë rrezik për dalje nga shtrati.
Ndërkohë situata e cila u krijua nga reshjet e dëbores në Mirditë është përmiresuar.Të gjitha fshatrat e thellë malor kanë dalë nga izolimi dhe rruget janë të kalueshme, ndërsa në pjesen më të madhe të territorit është rikthyer energjia elektrike.Referuar parashikimeve atmosferike moti i keq me reshje shiu pritet të shoqëroje Qarkun e Lezhës gjatë gjithë javes, ndaj dhe strukturat e Mbrojtjes Civile në të tre Bashkitë e këtij Qarku Lezhë, Kurbin dhe Mirditë janë vënë në gadishmeri të plotë për ti paraprire çdo situate që mund të krijohet.
Në gjendje gadishmerie ndodhet edhe Operatori i Shpërndarjes së Energjisë Elektrike, për të ndërhyre në çdo rast defekti dhe garantuar furnizimin me energji për popullaten.
