Çështja e rrëzimit të avionit në Vermosh të Malësisë së Madhe është bërë pjesë e debateve në Komisionin e Sigurisë ndërsa kjo ngjarje vijon të jetë ende një mister. Ka qenë deputeti demokrat, Enkelejd Alibeaj, ai që ka pyetur ministrin e Brendshëm, Bledi Çuçi, lidhur me ngjarjen.
Alibeaj e ka pyetur ministrin se si ka mundësi që policia nuk ka asnjë informacion mbi shtetasit që po udhëtonin me avion apo se çfarë po transportohej me të ndërsa ministri u përgjigj shkurt duke thënë se nuk është zëdhënës i Ministrisë së Brendshme.
Ndërkohë për rrëzimin e avionit në Vermosh policia vendore e Shkodrës përmes një njoftimi thotë se ende nuk është bërë e ditur identifikimi i pilotit, pasagjerit dhe personit të tretë që i mori me fouristradë dhe as arsyeja përse ai avion po fluturonte si dhe itinerari i tij.
Në njoftimin e policisë së Shkodrës thuhet se : “Më datë 04.10.2021, në orën 12:30, në sallën operative të Komisariatit të Malësisë së Madhe, Shkodër, ka ardhur një telefonatë se në fshatin Velipojë, Vermosh, Njësia Administrative Kelmend, bashkia Malësia e Madhe, ishte rrezuar një avion sportiv. Me marrjen e njoftimit, menjëherë në drejtim të adresës së dhënë u nisën shërbimet e Policisë dhe Drejtori i Drejtorisë Vendore të Policisë Shkodër, për të verifikuar informacionin, si dhe u ngrit grupi hetimor, nën drejtimin e Prokurorisë së Rrethit Gjyqësor Shkodër.
Nga veprimet e para hetimore dhe nga këqyrja e vendit të ngjarjes rezulton se në vijë ajrore rreth 800 m nga kufiri me Malin e Zi, është konstatuar i rrëzuar dhe i dëmtuar një avion sportiv dyvendësh, ngjyrë gri, me gjatësi 6 m, gjerësi 10.5 m (nga skaji i njërit krah te tjetri), gjatësi të krahut 4.7 m dhe gjerësi të kabinës 1.1 m., në të cilin nuk u gjendën shenja dalluese si: flamur, dokumente të origjinës apo ndonjë dokument tjetër identifikimi.
Gjithashtu, gjatë kontrollit të imtësishëm të kryer nga grupi hetimor në brendësi të avionit nuk u gjet asnjë send i kundërligjshëm. Në bashkëpunim dhe me vendet fqinje, Mali i Zi dhe Kosovë, po punohet për përcaktimin e itinerarit të fluturimit që ka ndjekur ky avion, identifikimin e pilotëve dhe të personave të tjerë të përfshirë.
Grupi hetimor, nën drejtimin e Prokurorisë së Rrethit Gjyqësor Shkodër, vijon veprimet hetimore për identifikimin e automjetit që ka marrë dhe larguar pilotët nga vendngjarja, si dhe për përcaktimin e shkaqeve të rënies së avionit”, përfundon njoftimi i policisë vendore të Shkodrës.
