Seanca e Kuvendit u ndërpre sërish pasi opozita qëndroi në foltore, ndërkohë që kreu i Kuvendit, Gramoz Ruçi ka përjashtuar kryetarin e PD-së Lulzim Basha nga seanca për ‘pushtimin’ e foltores.
Ruçi hodhi poshtë kërkesën e PD-së për debatin për komisionin e reformës zgjedhore pasdite, ndërkohë që me votim u vendos që ky diskutim të shtyhej për javës tjetër. Ndërkaq më herët, kryetari i Kuvendit Gramoz Ruçi ka njoftuar ngritjen e komisionit për reformën zgjedhore. Komisioni do të jetë dypartiak, do të trajtojë rekomandimet e OSBE-ODIHR dhe propozimet e partive që kanë marrë në zgjedhjet e fundit jo më pak se 1 për qind të votave. “Përbërja e komisionit do të jetë e barabartë mes shumicës dhe pakicës.
Komisioni do drejtohet nga dy bashkëkryetarë të PD dhe PS, Blendi Çuçi dhe Oerd Bylykbashi. Ndërkohë, ekspertë ndërkombëtarë janë të ftuar”, ka deklaruar Ruçi. Kryetari i Kuvendit ka shtuar se vendimet do të quhen kur të votohen nga të gjithë anëtarët dhe të kenë marrë konsensusin e bashkëkryetarëve. Ndër të tjera Ruçi ka bërë me dije se, ditën e djeshme Konferenca e Kryetarëve miratoi kalendarin e Kuvendit. Njoftimi i Ruçit është pasuar nga një debat mes krerëve të grupeve parlamentare Taulant Balla dhe Edmond Spaho.
Ky i fundit ka kërkuar debat për çështjen, ndërsa Balla e ka refuzuar këtë kërkesë me argumentin se debati do të bëhet në komisionet parlamentare. Në vijim të seancës fjalën e ka marrë kryetari i PD, Basha, i cili ka kërkuar nga kryetari të mbledhë Konferencën e Kryetarëve për të caktuar ditën e dabtit dhe i ka bërë thirrje atij që të mos vendosë me forcën e kartonëve. “Jeni një mazhorancë fiktive, në aleancë me krimin. Kjo situatë nuk mund të vazhdojë gjatë. Mblidh Konferencën e Kryetarëve dhe vendos për një afat të arsyeshëm debati.
Nuk mund të shtyhet debati për një javë. Shtyrja e debatit ka vetëm një qëllim, t’i mbyllësh gojën opozitës”, ka thënë Basha. Nga ana e tij Ruçi ka sqaruar se, nuk ka sens të mblidhet Konferenca kur Parlamenti është mbledhur për rendin e ditës. “Propozohet një votë pro dhe një kundër, qoftë për zgjedhje nga rendi i ditës. Një kryetar grupi ishte për debat, dy kryetarë grupesh ishin për diskutimin javën tjetër. Nuk mundet që Konferenca e Kryetarëve të marrë atributet që i ka seanca parlamentare. Kjo është një çështje e mbyllur”, ka thënë Ruçi, i cili i ka tërhequr vërejtje Bashës për faktin se ka bllokuar podiumin e Parlamentit.
