Uragani Helene ka goditur Shtetet e Bashkuara të Amerikës ditën e sotme, ku si pasojë 3 persona kanë humbur jetën, ndërsa mbi një milion shtëpi dhe biznese kanë mbetur pa energji elektrike në Florida.
Uragani është cilësuar si një ndër më të fuqishmit në vitet e fundit në Gjirin e Meksikës dhe u klasifikua si një uragan i kategorisë 4, “jashtëzakonisht i rrezikshëm”.
Erërat e Helene në rajonin Panhandle arritën shpejtësinë 150 milje në orë. Guvernatori Ron DeSantis siguroi se të gjitha masat për t’iu përgjigjur menjëherë pasojave të uraganit “janë në vend”, por u bëri thirrje banorëve të zonave më të rrezikuara të evakuohen.
Një person vdiq në Florida pasi një shenjë ra në makinën e tij dhe dy persona u raportuan të vdekur nga një tornado në Gjeorgjinë jugore ndërsa stuhia po afrohej.
Guvernatorët e Florida, Xhorxhia, Alabama, Karolina e Jugut dhe e Veriut dhe Virxhinia kanë shpallur të gjithë gjendje të jashtëzakonshme.
Presidenti Joe Biden kishte lëshuar një paralajmërim urgjent për banorët e prekur nga Helene, duke u kërkuar atyre që të ndiqnin udhëzimet e zyrtarëve lokalë dhe federalë.
“Ne presim stuhi katastrofike, erëra dhe përmbytje në të gjithë juglindjen, duke filluar në Florida që tani”, tha Biden në një fjalim nga Dhoma Lindore e Shtëpisë së Bardhë.
Autoritetet në Tampa të Floridës u kishin bërë thirrje banorëve “të mos largohen nga shtëpitë e tyre” për shkak të kalimit të uraganit.
“Mos u mundoni të sfidoni Nënën Natyrë, do të humbni 100 për qind”, u tha nga autoritetet.
Ndërkohë, një thirrje banorëve u shtë bërë edhe nga policia.
“Kush vendos të mos evakuohet, le të shkruajë emrin e tij në këmbë ose në krahë për identifikimin. Kjo do të lehtësojë identifikimin e kufomave”./La Repubblica
