Në kulmin e aksionit anti informalitet, shkarkohet nga detyra zëvendës drejtori i Përgjithshëm i Tatimeve, Ervin Hoxha.
Ky vendim vjen në kushtet kur vetëm një ditë më parë, kryeministri Edi Rama bëri publik lajmin se disa inspektorë tatimorë në qytetin e Durrësit kishin abuzuar me detyrën duke marrë ryshfet e duke i plotësuar raportet në kafene, nga dembelizmi, siç kreu i qeverisë u shpreh.
Rastet abuzive u zbuluan nga qytetarët, të cilët raportuan në aplikacionin “Stop Informalitet” për shpelje në subjektet që vetë inspektorët i kishin ‘firmosur’ si biznese të rregullta.
Në vitin 2017, Ervin Hoxha, ka mbajtur postin e drejtorit në Drejtorinë e Hetimit Tatimorë në Tiranë. Ai u dorëhoq nga ky post, pas arrestimit të tre inspektorëve në këtë drejtori. Tre tatimorët kishin shkuar për kontroll në një biznes në Spille, dhe i morën administratores shumën prej 40 mijë lekësh. Edhe në atë kohë, denoncimi u bë nga biznesi privat i cili i shkruajti drejtpërdrejt kryeministrit Edi Rama.
Letra e dorëheqjes në korrik 2017
“I nderuar zoti Kryeministër. Me cilësinë e Drejtorit të Hetimit Tatimor, ndiej përgjegjësinë time të drejtpërdrejtë për shfaqjen e turpshme të tre inspektorëve. Në këto kushte nuk mund të vazhdoj më ushtrimin e kësaj detyre. Sa më sipër, kërkoj dorëheqjen time të parevokueshme nga ky funksion. Ju faleminderit për besimin”
