Si çdo vit, Bashkia e Shkodrës në bashkëpunim me Drejtorinë Vendore të Policisë Shkodër, kanë nisur fushatën sensibilizuese anti- kanabis. Pavarësisht se është funksion primar dhe kryesor i Policisë së Shtetit, Bashkia e Shkodrës dhe strukturat e saj në territor, ofrojnë bashkëpunim maksimal për ndërgjegjësimin e banorëve.
Takimi i parë ishte me administratorë dhe kryetarë të fshatrave në njësitë administrative Berdicë, Ana e Malit, Dajç, Velipojë dhe Guri i Zi. Nënkryetari i Bashkisë Shkodër Arben Gjuraj ka nënvizuar rëndësinë e frenimit të fenomenit, i cili është i dëmshëm dhe i dënueshëm ligjërisht si për ata që kultivojnë por edhe ata që konsumojnë kanabis.
Shefi i Sektorit të Rendit dhe Sigurisë Publike në DVP Shkodër z. Pjerin Lazri, ka vlerësuar bashkëpunimin me Bashkinë e Shkodrës.
Nga pesë komunat që sot janë në këtë takim, ka thënë ai, vitin e kaluar vetëm tek njëra janë kultivuar bimë narkotike. Takimet për ndërgjegjësimin kundër kultivimit dhe përdorimit të kanabis sativa, vazhdojnë edhe në ditët në vijim.
