Qendra e qytetit të Shkodrës, pedonalja dhe lulishta e shatërvanit janë mbipopullar edhe gjatë kësaj fundjave. Të moshuar dhe prindër me fëmijët e tyre shfrytëzuan leje daljen për t’u argëtuar jashtë shtëpive të tyre.
Edhe të rinj të shumtë kanë thyer karantinën duke mos qëndruar brenda banesave dhe duke lëvizur lirisht në rrugët e qytetit. Të moshuarit thonë se lëvizja për ta është mëse e nevojshme
Më të vegjlit tregojnë se janë mërzitur duke qëndruar në shtëpi ndaj mezi e presin fundjavën. Një pjesë e këtyre fëmijëve u argëtuan me shokët dhe shoqet e tyre.
Kjo mund të jetë fundjava e fundit me lëvizje të kufizuara, pasi nga java e ardhshme pritet të ketë lehtësim të masave dhe të lejohen të dalin personat mbi 14 vjeç.
