Kryeministri Edi Rama ishte pasditen e së martës në Shkodër për anëtarësimet e reja në Partinë Socialiste, nga ku deklaroi se opozita është si “i dehuri i lagjes, që rri gjithë ditën duke sharë e përfolur”.
“I ofrojnë popullit vetëm baltë, shpifje dhe akuza. Çdo lagje e ka një të dehur që rri gjithë ditën duke sharë e përfolur lagjen. Kështu është edhe PD-ja”, tha Rama. “Gjëja më e lehtë është që t’i drejtohesh sot njerëzve që janë në hall e t’i kundërvihesh qeverisë dhe reformave. Por kjo është gjëja e vetme që dinë të bëjnë ata që ne gabimisht i quajmë opozitë. Ata nuk janë opozitë dhe kjo është mangësia e madhe e vendit, që nuk ka opozitë. Ka një qeveri të vjetër që ka rënë nga kali dhe një të re që bën detyrat. Të vjetrit jetojnë me idenë se populli bëri gabim që i dërgoi në shtëpi dhe mendojnë se populli do e korrigjojë gabimin, por i ofrojnë atij vetëm baltë, shpifje dhe akuza”, shtoi kreu i qeverisë. Kreu i qeverisë theksoi se “Partia Socialiste është forca e duhur dhe e vetme në këtë vend që mund të bëjë shtet” dhe se “sikur reformat që po bëjmë ne të ishin bërë kohë më parë, vendi do të ishte ndryshe sot”.
