Dy vjet nën mbikqyrje speciale për rrezik terrorizmi e riedukim pranë një qëndre islamike për t’u njohur me vlerat e vërteta të besimit mysliman është vendimi i marrë nga Gjykata e Barit ndaj 35 vjeçarit shqiptar Edmond Ahmetaj, rezident në komunën Noci në provincën e Barit.
Hetimet e Departamentit të Antiterrorizmit italian ndaj 35-vjeçarit shqiptar kanë nisur menjëherë pas atentateve terroriste në Paris në nëntor të 2015. Në celularin e Edmond Ahmetaj janë gjetur imazhe e video të aksioneve terroriste të ISIS shoqëruar me komentet e tij se “terrorizëm i vërtetë vjen vetëm nga qeveritë perendimore”. Gjithashtu në kompjuter i janë gjetur fotografi të tij me armë në duar si dhe postime në rrjete sociale pro atentateve terroriste në Paris.
Gjithashtu Edmond Ahmetaj ka shpërndarë në profilin e tij në facebook një video të intevistës së fondamentalistit anglez Anjem Choudary në të cilën kërcënon Italinë nën shpresën se luftëtarët e ISIS shumë shpejt do të mbërrijnë në Romë. Kreu i sektorit të parandalimit në Gjykatën e Barit, Franceska La Malfa duke konsideruar rrezikshmërinë e shtetasit shqiptar ka marrë vendimin e vendosjes së masës së mbikqyrjes speciale për dy vjet rresht, duke i tërhequr pasaportën si dhe të gjitha dokumentet e tjera të identifikimit, si dhe moslejimin e largimit nga komuna e tij e rezidencës në provincën e Barit. Edmond Ahmetaj, i cili jeton prej vitesh në Itali, në maj të vitit 2015 kishte marrë nënshtetësinë italiane. Ai ka pranuar vendimin e Gjykatës së Barit për t’u rideukuar pranë një qëndre islamike me qëllim njohjen e vërtetë të besimit mysliman.
