OBSH ka bërë apel urgjent për një ndihmë prej 8 milion dollarë si një përgjigje ndaj situatës së krijuar nga tërmeti në Mianmar, ku rreth 1,700 persona kanë humbur jetën dhe mijëra të tjerë janë në rrezik të lëndimeve dhe sëmundjeve.
Agjencia e OKB-së ka deklaruar se ndihma dhe donacione nevojiten për të parandaluar shpërthimet e sëmundjeve dhe për të rivendosur shërbimet thelbësore shëndetësore gjatë 30 ditëve të ardhshme.
Më shumë se 1,700 persona gjetën vdekjen dhe rreth 3,400 mbetën të plagosur si pasojë e një tërmeti 7.7 të shkallës rihter që goditi afër Mandalay, qyteti i dytë më i madh i Mianmarit të premten.
Në Bangkok rreth 1000 km larg nga epiqendra, 76 punëtorë ndërtimi mbeten të bllokuar në rrënojat e një ndërtese të lartë. Tërmeti tragjik është një goditje e mëtejshme për Mianmarin, i cili është përfshirë nga një luftë civile që nga një grusht shteti ushtarak në 2021.
