Edhe pse Shqipëria e zhvilloi sezonin turistik të vitit 2021 nën sloganin ‘COVID-FREE’ pa aplikuar masa kufizuese në kufi për shtetasit e huaj që vinin në vend, të ardhurat nga shpenzimet për turizëm nuk arritën shifrat e para pandemisë. Sipas të dhënave të Bankës së Shqipërisë turistët shpenzuan në vendin tonë 1.912 miliardë euro, nga 2.083 miliardë euro që shpenzuan në 2019. Shpenzimet për turizëm në vitin 2021 ishin 171 milionë euro më pak se në vitin më të suksesshëm të turizmit që është 2019-ta. Kjo rënie e shpenzimeve në raport me 2019, është edhe në të njëjtën linjë me numrin më të ulët të shtetasve të huaj që kanë ardhur në Shqipëri në 2021, ndikuar edhe nga masat kufizuese që aplikuan shumë shtete të huaja prej pandemisë COVID-19.
Ndërkohë në raport me vitin e vështirë të pandemisë, të ardhurat nga turizmi kanë qenë dyfish më të larta në 2021. Krahasuar me vitin 2020 shpenzimet nga shtetasit e huaj në vend për turizëm janë 923 milionë euro më shumë, pasi në 2020 shpenzimet ishin vetëm 989 milionë euro për shkak se shumë shtete ishin në izolim total prej përhapjes së virusit. Nga ana tjetër masat kufizuese të shteteve të huaja, kanë mbajtur më shumë shqiptarët brenda vendit, pasi në raport me vitin 2019 shpenzimet jashtë vendit janë 510 milionë euro më të ulta. Konkretisht në vitin e kaluar shpenzimet jashtë vendit për turizëm ishin 1.072 miliardë euro, nga 1582 miliardë euro në 2019. Ndërsa në raport me vitin 2020 shqiptarët kanë harxhuar jashtë vendit vjet 405 milionë euro më shumë pasi para dy vitesh jashtë vendit për turizëm kishin dalë 667 milionë euro.
SHPENZIME BRENDA VENDIT
Viti 2018 1,857 mld euro
Viti 2019 2,083 mld euro
Viti 2020 989 mln euro
Viti 2021 1,912 mld euro
SHPENZIMET JASHTË VENDIT
Viti 2018 1,227 mld euro
Viti 2019 1,582 mld euro
Viti 2020 667 mln euro
Viti 2021 1,072 mld euro
SHTETASIT E HUAJ TË ARDHUR NË SHQIPËRI
Viti 2019 6,406,038 të huaj
Viti 2021 5,688,649 të huaj
Diferenca -717,389 të huaj
