Heroi Afrim Bunjaku, efektivi i cili u vra pas sulmeve në veri të Kosovës, është nderuar ditën e sotme në Ambasadën e Kosovës në Bern të Zvicrës, si dhe në konsulatat në Gjenevë e Cyrih.
Lajmin e ka bërë të ditur përmes një njoftimi Ambasada e Kosovës, e cila theksoi se në mjediset e saj, në Bern, si dhe në konsulatat në Gjenevë dhe Cyrih, sot u bënë homazhe dhe u ndezën qirinj në nderim të heroit Afrim Bunjaku, i cili ra në krye të detyrës nga bandat terroriste serbe. Grupi polifonik i Sarandës i kushton këngë policit të vrarë në Kosovë, Afrim Bunjakut. Me këtë rast, u dënuan aktet e tilla kriminale dhe terroriste të organizuara dhe të përgatitura nga Serbia me qëllim të destabilizimit të Kosovës dhe të rajonit.
“Njëherësh, bashkatdhetarët tanë i dhanë mbështetje Qeverisë dhe të gjitha organeve tjera të sigurisë për intervenimin e shpejtë dhe profesional për shpartallimin e këtij grupi të armatosur me armë ushtarake dhe të përgatitur për akte të tilla terroriste kundër Kosovës së pavarur dhe sovrane”, thuhet, mes tjerash, në njoftim.
