Ashtu si 573 vite më parë, dasma arbërore e Skenderbeut me Donikën, u inskenua në gurët e lashtë të kishës së Shën Mërisë në Vau Dejës. Në këtë vend të shenjtë, një pjesë e historianëve mendojnë se heroi ynë kombëtar u martua aty dhe jo në Ardenicë me të bijën e Gjergj Arianitit, princ i Kaninës së Vlorës më 26 prill 1451. Regjisorja Valbona Lluka thotë se u morën detaje nga libri i Marin Barletit për të kurorëzuar dasmën e Skendërbeut.
Bashkia Vau Dejës organizua këtë pjesë teatrale të dasmës së heroit tonë legjendar.
Nikson Shabani, përfaqësues i katolikëve shqiptar në Austri dhe disa shtete të tjera, një prej ideatorëve të kësaj dasme dhe hulumtues i figurës së Skendërbeut thotë se me këto ngjarje kulturore mbajmë gjallë kujtesën tonë historike.
Për dy studiuesit dom Nikë Ukgjini, famullitar i Kukelit në Vau Dejës dhe akademikun Primo Shllaku dasma e Skenderbeut është fillimi i një epoke restauruese në një kohë kur shumë objekte kulturore e historike janë shkatërruar apo kur ende shqiptarët nuk e njohin vendin e tyre.
Pjesëmarrësit në dasmën e improvizuar të Skenderbeut përveç emocioneve shprehen se këto ngjarje të mëdha të kombit shqiptar nuk duhen lënë në harresë nga institucionet.
Kisha e Shën Mërisë ku mendohet se mund të jetë vendi ku Skenderbeu kurorëzoi dashurinë e tij me Donikën, u ndërtua në shekullin e XIII. Ajo kishë ishte e vetmja e stilit romak që ruhej në Shqipëri derisa komunizmi e shembi me tritol në vitin 1967 duke sjellë kështu një humbje të madhe të trashëgimisë kulturore.
https://youtu.be/vPWaidswpZU
