Skuadra e Vllaznisë në volejboll për meshkuj do të ketë përballjen e radhës ndaj një rivale direkt për kreun dhe titullin kampion.
Shkodranët presin në mesjavë Studentin. Patjetër që cilësohet si një përballje e vështirë. Studenti është një prej ekipeve më të mira dhe duhet që të vlerësohet maksimalisht si e vetmja rrugë për të arritur suksesin në këtë përballje. Gjithsesi edhe Vllaznia ka treguar këtë sezon se është e denjë për t’u përballuar dhe për të fituar ndaj çdo skuadre. Volejbollistët duhet që të ruajnë qetësinë dhe të mos ndikojë euforia në lojë sepse shpesh herë edhe jemi dëmtuar. Pritet që të jetë një ndeshje e bukur dhe më e rëndësishmja është pikërisht kjo që të ketë emocione për ata që do të vijnë për ta parë këtë ndeshje. Objektiv për Vllazninë është fitorja ndaj Studentit. Edhe pse dihet shkalla e vështirësisë kuqeblutë nuk mund të kërkojnë rezultat tjetër përveç fitores dhe për këtë do të bëjmë maksimumi për t’ia arritur qëllimit. E rëndësishme është që të mos ketë neglizhim në asnjë moment dhe vëmendja të jetë e përqendruar e gjitha tek kjo sfidë që vë përballë dy prej ekipeve më të mira. Lojtarët kanë marrë ngarkesën e duhur në stërvitje. Patjetër që kjo ndaj Studentit është një ndeshje specifike dhe si e tillë janë zhvilluar edhe seancat stërvitore. Volejbollistët gëzojnë një formë të mirë sportive. Në ndeshjen Vllaznia-Studenti pritet që të vijnë një numër i madh tifozësh për të mbështetur skuadrën e tyre të zemrës, Vllazninë. Në sfida të tilla tifozët kuqeblu asnjëherë nuk kanë munguar duke krijuar një atmosferë të ndezur dhe duke i dhënë kurajo volejbollistëve shkodran. Po ashtu edhe vetë volejbollistët dhe stafi i Vllaznisë kërkojnë që prania e tifozëve të jetë sa më e madhe në mënyrë që ta kenë sa më të lehtë fitoren dhe emocionet të jenë sa më të mëdha.
