Vrasja e një tjetër afro-amerikani nga policia ka nxitur protesta të reja për dhunën me baza racore në qytetin amerikan të Mineapolisit.
Dhjetëra protestues u ndeshën në distancë me oficerë të policisë, duke marrë si kundër përgjigje gazin lotsjellës.
Para mesnatës arritën në vendngjarje edhe trupat e Gardës Kombëtare kur protestuesit po bëheshin gati të vandalizonin dyqanet e zonës.
Shkak për trazirat u bë goditja për vdekje e 20-vjeçarit Donte Rajt.
I riu u ndalua të dielën në mesditë për shkelje të rregullave të qarkullimit, por u zbulua se po ashtu ishte shpallur në kërkim nga autoritetet.
20-vjeçari nuk pranoi të arrestohej ndërsa një oficer zbrazi armën e vet duke i marrë jetën.
“Kishte vetëm disa aromatizues në makinë dhe i kërkuan të zbriste. U fut sërish brenda për t’u larguar. Këtu dëgjova në telefon që i thanë ‘Donte, mos ik’. E dashura e tij tha se e qëlluan, pastaj u përplasën me makinë,” tha e ëma e viktimës.
Mineapolisi është edhe qyteti ku vitin e kaluar humbi jetën afro-amerikani George Floyd, përsëri viktimë e policisë pasi nuk iu bind urdhrave për arrestim.
Gjyqi për oficerët që dyshohet se shkaktuan vdekjen e tij, po hyn në javën e tretë.
