Ministri i Drejtësisë i Qipros, Ionas Nicolaou, sot dha dorëheqje pas protestave dhe thirrjeve publike rreth vrasjes së të paktën shtatë grave në një vrasje serike që vazhdoi për tre vjet.
“E informova Presidentin e Republikës se po jap dorëheqje për shkak të ndjeshmërisë politike”, tha ministri Nicolaou para gazetarëve.
Nicolaou dorëzoi dorëheqje te presidenti i Qipros, Nikos Anastasiades, i cili tha se Nicolaou nuk ishte përgjegjës për rastet, por dha dorëheqje për shkak të “ndjeshmërisë politike” të tij.
Oficeri ushtarak grek Nikos Metaxas, 35-vjeçar, ka pranuar se ka vrarë shtatë gra të huaja, përfshirë edhe dy vajza.
Ai u arrestua më 14 prill në një hetim për vrasje të nisur pasi 39-vjeçarja Mary Rose Tiburcio nga Filipinet u gjet e vdekur në perëndim të Nicosias.
Janë gjetur mbetjet mortore të katër grave ndërsa policia ende po kërkon kufomat e tre viktimave tjera.
Në mesin e viktimave ishin shtetaset nga Filipinet Arian Palanas Lozano dhe Maricar Valdez Arquila, shtetaset rumune Livia Florentina Bunea dhe vajza e saj 8-vjeçare Elena, shtetasja nga Nepali Kata Anou si dhe Sierra, vajza 6-vjeçare e Tiburcios.
Të gjitha viktimat ishin gra emigrante që kishin ardhur në Qipro për të punuar. Administrata e Qipros kërkoi ndihmë nga ekspertët britanikë për rastin e vrasësit serik që u etiketua si rasti i parë i këtillë në ishull.
